Praktísk atriði:
– Keppendum býðst skutl frá Hvolsvelli á Hellu eftir keppni.
– Ein drykkjarstöð er á leiðinni.
– Öllum keppendum er boðið í súpu, grill og sund að lokinni keppni.
– Veðurspáin er mjög hjólavæn!
– Vaðið yfir Fiská krefst varúðar.

• Handbók keppenda 2019
• GPX track af leiðinni má nálgast með því að senda póst á eirikur@ry.is

Sjáumst í Rangárþing Ultra!

Keppnisreglur

Þó svo að Rangárþing Ultra sé ekki haldið innan vébanda Hjólreiðasambands Íslands (HRÍ) þá gilda kaflar 3.4 til og með 7.8 í reglum HRÍ í mótinu, að öllum köflum þar á milli meðtöldum. Að auki gilda eftirfarandi reglur til viðbótar eða víkja til hliðar reglum HRÍ:

1. Það er leyfilegt að þiggja mat / drykk á leiðinni utan drykkjarstöðva. Ekki má undir nokkrum kringumstæðum rétta mat eða drykk úr bíl á ferð. Séu keppendur með fylgdarbíl má sá bíll keyra á undan keppendum og leggja þar sem bifreiðin getur verið með öll hjól utan keppnisbrautar. Þaðan má rétta mat og drykk inn í braut.

Að auki eru almennar reglur Alþjóðahjólreiðasambandsins (UCI) um fjallahjólamaraþon (XCM) hafðar til viðmiðunar við dómgæslu.

Dómarar með UCI-réttindi munu dæma keppnina. Þátttakendur sem ekki fara eftir þessum reglum eiga á hættu að verða skráðir úr mótinu eða vísað úr keppni.

Helstu atriði sem keppendur ættu sérstaklega að kynna sér úr reglum HRÍ:

• Þátttaka er á ábyrgð keppenda.
• Keppnin fer fram á opnum vegum, og ber keppendum að virða umferðarreglur öllum stundum, t.d. þegar bílum er mætt, eða þegar hjólað er út á akbraut.
• Hvarvetna þar sem hjólað er á malbiki skal hjóla hægra megin við miðlínu.
• Bannað er að nýta sér skjól af faratækjum.
• Ekki má stytta sér leið. Yfirgefi keppandi keppnisleiðina verður hann að koma inn á hana á stað og hún var yfirgefin.
• Það er leyfilegt að þiggja tæknilega aðstoð á leiðinni en ekki má skipta um stell. Sé farið út úr braut til þess að gera við búnað þarf að koma aftur inn á brautina á sama stað og farið var út úr henni og hefja þar keppni aftur.
• Keppandi sem veldur truflun í keppni með því að hindra eða stofna öðrum keppanda í hættu (t.d. í endaspretti) dæmist úr leik. Ber þar helst að nefna skyndilegar hraða- og stefnubreytingar í hóp hjólara.
• Í endaspretti skal keppandi undantekningalaust halda beinni línu og hafa a.m.k. aðra hendi á stýrinu. Dómari getur áminnt keppanda, dæmt keppenda aftast í hóp eða dæmt keppenda úr keppni, eftir alvarleika brotsins.
• Keppandi sem fer yfir marklínu má ekki bremsa niður fyrr en 50 metrum eftir hana og þá skal hann fara út í vegkant eða út af veginum áður en hann stöðvast alveg. Ekki má vera stopp á miðjum veginum eftir marklínu. Alls ekki má hjóla til baka að marki nema í vegkanti, og þá einungis mjög hægt. Ekki má fara aftur yfir tímatökubúnað.

Búnaður: Allir keppendur skulu hjóla með reiðhjólahjálm á meðan á keppni stendur.

Leyfileg hjól:

• Öll venjuleg reiðhjól eru leyfileg í keppninni, en gæta skal að búnaður á því (ef til staðar), svo sem standari, bögglaberi, bretti eða annað slíkt, sé vel festur, og af búnaðinum stafi ekki hætta fyrir aðra keppendur.
• Liggistýri, letingjar, TT-bars eða annar sambærilegur búnaður er bannaður í allri keppninni. Venjulegir stuttir stýrisendar (festir á enda fjallahjólastýris) eru leyfðir.

Fylgdarbílar: Fylgdarbíla skal skrá með því að senda tölvupóst á nanna@hvolsvollur.is fyrir kl. 12:00 fimmtudaginn 13. júní.

Eftirfarandi skal koma fram:

1. Hvaða keppanda/keppendum er verið að fylgja eða tilgreina lið.
2. Skráningarnúmer bíls, gerð og litur.
3. Nafn, netfang og símanúmer bílstjóra og aðstoðarmanns (sé um hann að ræða).

Allir bílar í braut á vegum eða með heimild mótsstjórnar eiga að vera merktir í afturrúðu og hliðarrúðum með einkennisstaf:

Dómarabílar                      D
Ljósmyndarabílar og álíka M
Aðrir bílar mótsstjórnar      K
Fylgdarbílar                      F

Fylgdarbílar skulu einnig vera merktir í framrúðu (neðst hægra megin), þó ekki þannig að byrgi bílstjóra sýn.

Fylgdarbílar skulu í einu og öllu fara eftir fyrirmælum dómara og skulu alltaf keyra á eftir dómara; fylgdarbílar mega aldrei vera á milli dómarabíls og keppenda nema með sérstöku leyfi dómara. Þegar tími á milli hópa er orðinn nægur til að dómari telur það vera öruggt að fara á milli hópa færir dómarabíllinn sig á milli hópanna og þeir fylgdarbílar sem eiga liðsmenn í þeim hóp fylgja á eftir en aðrir elta sinn hóp.

Einungis má veita aðstoð þegar fylgdarbíllinn er kyrr og þar sem það er öruggt, sjá reglu A.

Allir bílar í braut skulu alltaf hafa hættuljós (hazard ljós) blikkandi.

Brot á reglum:

• Þáttakandi sem fer ekki eftir ofangreindum reglum verður dæmdur úr keppni ef annað er ekki tekið fram í tiltekinni reglu.
• Mótsstjórn áskilur sér rétt til að stöðva í ræsingu hvern þann sem ekki fylgir þessum reglum.

Skilmálar vegna þátttöku í Rangárþing Ultra 2019

Keppendur verða að undirrita skilmála vegna þátttöku áður en keppni hefst.

• Keppendur og þeirra búnaður er á eigin ábyrgð.
• Rangárþing Ultra áskilur sér rétt á að nota myndir og myndbandsbúta af þáttakendum í markaðsefni keppninar.
• Það er með öllu óheimilt að henda rusli á keppnisbrautinni að undanskildu þar sem starfsfólk keppninnar getur tekið við því. Einnig má afhenda fylgdarfólki eða fylgdarbíl rusl á leiðinni.
• Flagan festist á hjólið. Engin flaga enginn tími. Flögunni verður að skila, starfsmaður tekur flöguna af hjólinu eftir keppni.